X أغلق
X أغلق

تواصل معنا عبر الفيسبوك
حالة الطقس
عبلين 27º - 14º
طبريا 28º - 12º
النقب 30º - 10º
الناصرة 28º - 14º
القدس 27º - 5º
حيفا 27º - 14º
تل ابيب 26º - 12º
بئر السبع 30º - 12º
ايلات 32º - 12º
مواقع صديقة
عبلين في عيون ابنائها - موقع الغزال
اضف تعقيب
08/11/2020 - 10:28:46 am
عبلين في عيون ابنائها: السيدة والرفيقة فوز عثمان عبيد

عبلين في عيون ابنائها

السيدة والرفيقه فوز عثمان عبيد


احبك 
جدا 
جدا
وحبك يسري في شراييني
يا دما يحرك اضلعي
يا حلما الوذ بدفئه
يا نغما يلازم مسمعي
انت مسكني ومضجعي
وانت وحيدة قلبي للابد
نعم انها السيده والرفيقة فوز عتمان عبيد
اول امراة تصل كعضوة مجلس محلي في عبلين 
فقالت:
كلمه حلوة وكلمتين...حلوه يا بلدي
غنوة حلوه وغنوتين ...حلوه يا بلدي
أملي دايما كان يا بلدي ..اني ارجعلك يا بلدي
وأفضل دايما جنبك على طووول  


عبلين في عيوني ...الأم الحنون.. الوطن الأصغر البقعة التي شائت الارادة الالهية ان انتمي اليها ..الاماكن والحارات التي احب..ذكريات الطفولة والصبا ..المكان الذي يمنحني نشوة الوصول وشعور الامان بعد كل غياب وبعاد ..عبلين بالنسبه اللي هي وجوه الناس اللي بحبهن ..المكان اللي بشعر فيو بقيمتي الحقيقية ..المكان اللي بحب اربي ولادي فيه ،المكان اللي بصمتي وتأثيري واضح ومعروف المكان اللي بشارك في صياغته باحلى واجمل ما عندي من قدرات وقيم ..بحب اشوف البلد عم تكبر وتتطور ..عمرانيا وانسانيا ..بحب الناس الطيبه اللي فيها وبحثهن دائما على  القواسم المشتركة ..حارة الطفولة (الجلمه) اهلي، عيلتي، وجيراني ..جوزي وولادي وبيتنا في (بير سبيل) الطبيعة واشجار الزيتون الخضرا اللي بتحاوطنا من كل النواحي، جيراني الطيبين ..عبلين هي ليالي الميلاد في قاعة مسجد السلام  هي ليالي رمضان في بيت القديسه هذا الكم الهائل من المحبه المتبادله بين رجال الدين من الطائفتين واللي عم بعكس ايجابيا على كل ولادها ولهم مني كل الحب والتقدير ..عبلين هي بداياتي بجوقة الكروان الرائعه واصدقائي هناك ..عبلين هي لقائي بأصدقائي بمجموعة القراءة كل شهر وهذا التواصل الجميل ..عبلين بالنسبه الي هي رفاقي في الحزب والجبهه وعملنا المتواصل لننهض ببلدنا وبأهلنا ووطنا عبلين بالنسبه الي هذا التشبيك الرائع بين الاطر والجمعيات والتعاون والتطوع والمسؤوليه اللي عم يوخذها الجميع على حالو من اجل عبلين ..عبلين هي كمية الخير اللي عم تظهر يوم بعد يوم بهالأزمه اللي عم نعيشها من اشهر ..هي حملات الخير والمساعدة والمسانده لكل بيت عبليني حتى ما يبات طفل جوعان هذا كله مش مفهوم ضمنا ومش موجود بكل بلد ..عبلين هي كثير اشياء صعب انو اتذكرها واذكرها كلها ..بس اللي بعرفو انها عبلين مش حياله بلد ..بلدنا بلد القداسه والتاريخ المشرف. فمسؤوليتنا كبيرة انو نحافظ عليها ولازم دايما نسأل نفسنا شو اعطينا للبلد ؟عشان البلد اعطتنا كثييير...
بحب اشوف بلدنا عم تتقدم والدور الاساسي في تقدمها هني ولادها صباياها وشبابها اللي عم بحطو كل طاقاتهن وابداعاتهن وتميزهن بكافة المجالات اولا في خدمة بلدهن ...بتمنى انو نبلش نذوت القيم في تربيتنا
ببيوتنا ...قيم الانتماء للبلد والمحافظه عليها ..العطاء والتطوع لمجتمنا لننهض ونرتقي بمستوى يليق فينا..المسؤوليه تجاه وجودنا بهالمكان وشو ممكن نقدم لتقدم البلد ..
بتمنى انو تجربتي كأول امرأه تترأس قائمة عضويه وتنجح بالوصول كأول عضو مجلس تكون محفز لكثير صبايا ونساء انهن يتشجعو ويوخذو دورهن بالسياسه وبالمجتمع ويأثرو بمجتمعهن لانهن قادرات وعندهن الكفاءات ..بتمنى اشوف نساء مرشحات لرئاسة المجلس ومش بس عضويه لانو ما بنقصنا شي بل بالعكس..بحب اشوف الشباب والصبايا يكون الهن دور فعال ومفيد لبلدهن ويوخذو فرصتهن ..بدي اشوف شباب وصبايا مبادرين لمشاريع حيويه بالبلد ..بحب اشوف رؤوس الاموال والمقتدرين عم بفكرو انهن يسثمرو بكثير مشاريع بتنقصنا ومن شأنها انها تدعم اقتصاد البلد ..بحب ندعم العلم والثقافه والوعي ونعطي من طاقاتنا شوي لولاد بلدنا ..بتمنى ندعم الابداع في الفن والموسيقى وكافة المجالات ويكون الاشي متاح لكل طفل وطفل عبلين ومش بس للمقتدرين ماديا ..بتمنى ندعم ونعزز مكانة المرأه إيمانا بأهمية دورها في بناء أسره ومجتمع سليم ..بتمنى وبحلم ورح اعمل المستحيل لكثير اشياء تتغير للافضل بهالبلد الغالي علينا جميعا ..ولا يسعنى سوى ان اهديكم قصيدة  القائد والشاعر الفلسطيني الذي أعشق توفيق زياد لتجمل كل ما اتمنى (احب لو استطعت بلحظة) 
أن أقلب لكم الدنيا رأسا على عقب
أن أقطع دابر الطغيان 
أن أحرق كل مغتصب 
وأجعل أفقر ألفقراء يأكل في صحون الماس والذهب
وأهدم كوخه  وأبني له قصرا على السحب
صمودا أيها الناس الذين أحبهم
صبرا على النوب
ضعوا بين العيون الشمس 
والفولاذ في العصب 
سواعدكم تحقق أجمل الاحلام 
تصنع أعجب العجب..
حقا 
رفيقه فوز 
انت رائعه  
وعبلين تعتز بك.




Copyright © elgzal.com 2011-2024 | All Rights Reserved © جميع الحقوق محفوظة لموقع الغزال
سيجما سبيس بناء مواقع انترنت