زجل النّورُ مَعنا بقلم :اسماء طنوس المكر

نورُ الرّبِّ الغامِـرنا     بيِعطينا من فَيْضُه كْثير

دَوْماً معنا وناصِرنا      دَربُه الصَّـح لا التّعثيـر

 بيِعطينا نورَ الحياه      الظُّلمِـه ما بتُــسكُـن فيـه

كُنّا بالعتــمِــه لَوْلاه    هالقلِب مـين بيِضـــويـــه

نورُه للمُؤمن أعطاه     تَيْـــنَوِّر قلبُــه ويِهديـــه

واللّي ما بيُطلُب ايّاه     بيِلقى الفشل والتّعســير

 والنّور السّاكن فـينـا     بيصَلِّـح فيــنا التّفكيــر

بيِفحص كُل شايِن بينا     وِبْيِعمل فينا التّغيـيــر

وبالضّعـــفِ بيـقوّيــنا      عالحياه إلـــو تَأثيــر

ولمّا معنــا بيِغنـيــنــا     للعمـل هُوِّ التّيْسـيـــر

 نورَك ربّـي إلهامــي     بيزَوِّدنـي بالحِكــمِه

بأعمالــي وِبأيّــامــي     بْلاقي حالي بِالنِّعمِه

مَلّــى قلبــي بســـلامِ     ومَحبِّه بَدَلِ النّقمِـــه

فِيّو بحَقِّـق أحلامــي     هالمُعطي دونَ تقصير