قصيدة زجلية : لمّا نكون بجولتنا  بقلم : أسماء طنوس  -  المكر

بأحضانِـك يا  ضَيْعِتْـنا

الـزعـتـر  بيـفـوح

لمّـا نكـون بجَـوْلِتنـا

بِـتِـرتـاح  الــروح

---------------

بين الصخـراتِ مْشيـنا

وِشَـمّـينـا  عـطـور

قَـعَـدْنـا وِتهنّـيـنـا

وأكـلـنـا  فـطــور

بعديـن قُمـنا  وِلْعِبْـنا

وقـطـفـنـا  زهـور

ولمّـا مشينـا  وِتْعِبْـنا

نَـويــنـا  نــروح

---------------

ريحـة عِشبِـةِ الشّـايِ

شـيء مِـش  معقـول

وجَـوِّ الطبيعَه الهـادي

بيِـسـحِـر الِعْـقـول

راعي  بيعـزِف عَالنايِ

وبـيـرَعّـي سْخـول

بتِلْـحَقُه وهِـيِّ  جايِـه

مَـطـرَح مـا يْـروح

---------------

هـون التّلِّـه والـوادي

وهُـنــاك  زهــور

وهون الطيور عَم  بِتنادي

وصـوت الشـحـرور

الصِّحَـة بتـزيد زياده

بـتـبـقَـى مسـرور

مِـن هواكِ ضَيْـعِتـنا

بتِـشفـي  المجـروح