زَجل    العيد في لَمَّةِ الأحباب     بقلم: أسماء طنوس - المكر 

العيد إِلو نَكْهَه في لَمِّةِ الأَحباب

                     كُل  ما    بِيلتِقوا   بِتزيد   أَفراحُه

والعيد بيبقَى عيد في رَجْعِةِ الْغِيّاب

                     كُلّ  ما   بِيُطلّوا  عطورهُم   فاحوا

ولمَا تصافِح قريبَك وتِنْسَى كُلّ اسْباب

                     وِتْعَزّي كُلّ مِسكين وتِشْفيلُه الِجْراحُه

وِالعيد ما هو أَكْل ما لَذَّ وَطاب

                     وعيونَك عَالفقير ما اتْطَلَّعوا  وزاحوا

العيد بَسْمِة أَمَل وتَشْجيع لِلّي خاب

                     تَتِرْجَع هِمِّتُه ويِنْسَى  اللّي هُم  راحوا

وقلوب تِتْصافَى ما يْدور بينها عْتاب

                     وِيْعُمّ فيها الرِّضَى مِن الْبُغْض إرتاحوا

وينْسوا اللّي بينهُم كان مِن غَيْرِ حِساب

                     وعَكُلّ   شي   مِتْعِبْهُم    بِهِ   طاحوا

وِالعيد صَفْحَه جديدِه في أَوَّل كِتاب

                     الكُتْبِ  الْعَتيقَه   مِن  فِكرِكَ  اتْماحوا

ويا اللّي رِجِع لَرَبُّه وعَن ذُنوبُه تاب

                     رَيَّح  ضَميرُه  والْبَسمات  قَد  لاحوا