زجل لا  للحرب - بقلم أسماء طنوس المكر 

       
ما بدنا حرب ولا ضرب ----  فيها   دمار  وخراب    
 بدنا الدِّنيي  وَرد  وحُب ---- والناس يعيشوا أحباب  
______________________________   
بدنا  الشّجر  بنَوِّر زهر ---- وتِملى   هالدِّنيي  نُوّار 
وتِملى  هالأجواءِ  عِطر---- وتشرق الشَّمِس  بأنوار  
وبدنا نعيش  بأحلى عُمر---- ونِتنفَّس  غِنا   وأشعار  
وَرا   العُنفِ  ما   نِنجرّ ---- وما نفتح  للعنفِ  باب   
_______________________________    
الله   أعـطانا   النِّعـمِه  ----  ليه نركض وَرا الشيطان    
اللــه الــه  الرّحــمــه  ----     بيشجِّعنا عالايمـان   
ليه تنعيش بالنقــمه  ----    بسببها ما في أمـان  
ونعيش بخربه وعتمه---- وناس يموتوا بالعذاب  
___________________________     
وأطفال صغار يموتوا---- تحت  الهدم  والدَّمار  
منهم ما  لاقى  قوتُه  ---- ماتوا بالقصفِ والنار   
ولا ملجأ لاقوا يفوتوا ---- وبلا اكل   ليل  نهار    
والله   بينادي  توبوا  ---- ليهِ الوَضِع عَم يِنهار