زجل  لشهر شباط  بقلم :اسماء طنوس المكر

  
              نِحنا في شَهِرِ شباط ________ يالــلّي ما عـلـيهِ ربــاط
              هيكِ قالوا بالأمثال  ________ بتــفكـيرَك إنَّــك لَـبّــاط   
              ________________________________
             وما بتُصدُق بكلامَك ________ فيـك البـرد وفيــك الحـر
             وفيـك قلـيلِه أيامـَـك  ________بين الأشهر أصغر شــهر
             وبِتخطِّـط لأحلامَـك  ________ وما مَرَّه بتِـرسي عَ بَــرّ
            وِال رسمتُه بمنامَك  ________ مِنّـــو صابَــك الإحبــاط
            _________________________________
            إن شَبَطْت وإن لَبَطْت________ ريحةِ الصيف بتبقى فيك
           ومهما شَدّيت وخَبَطْت________ أيّامَــك ما راح تِكــفـيــك
           لِآذار رُحــت وسألـت ________ من أيّـــامُــه تَيِـعـــطــيك
           يا بِن عـمّي إذا شِئـت ________ لا تْخَيِّـــب أمَـــل شبــاط
           __________________________________
           بَدّك تزيــد الــبردات ________  تَالعـجـــوز توقِــد دولاب
           وما بيهِمَّك الصقعات________  لَوْ عندا ما ظـلّ احطــاب
          ولَوْ بالـبرِد كُــلٌّ بـات________ ما هَمَّك لَوْ مـَـرَض جـاب
                    حتّى لَوِ المرض فات________ بتــبــقى قـــاسي كَالبــلاط