زجل للصوم الأربعيني بقلم: اسماء طنوس المكر

بْدينا بالصّـومِ الِكْبيـر___ بالصّومِ الأربعـيـني
الصوم لِأجلِ التّكفير___ تَالغُفــرانِ يِعطــينـي
__________________________
يا صايِم صالِح رَبَّك ___ وِالتَّوْبِه أُطلُـب مٍنّــو
راح يِغفِرلَك وِيْحِبّك ___ ما بتِقدر تِبعِد عَنّـــو
مَهما كان كْبير ذَنبَك ___ بِتْظَلَّـــك إنــتَ إبنـو
ما بيِغضَب أوْبيعاتْبَك___شوأخْطيت مْنِ سْنينِ
__________________________
رُحْ صالِح خَيَّك بِالدّار___ وخَيَّك في الإنسانِيِّه
إنسَ ال بينكوياللّي صار___ تَتِربـحِ الأبَـــدِيِّــه
رَبَّــك حَنـــون وغَفّــار ___ غافِرلَك الخطِيِّـــه
لا تْـــقَــدٍّم أيَّ أعـــذار ___قُلْ من ذنبي إعْفيني
___________________________
شو بَدَّك أكثر مِن هيك ___ غُفرانُه لَك مَجّـانـي
كُلّ الخطايا ال عَليــك ___ راح يِمحيها بْثَواني
شَرْط تْقولُّه راجع ليك ___ما بْعود لِلْخطا ثانـي
بالنِّعَــم راح يْمَــلّــيـك ___ وِتْقول رَبّي ما نسيني
___________________________
وِالصّوم بينَظّف قْلوب___ لَمّا الِقْلوب تْصـافـــي
والخطيِّه كَالمكــروب ___ ما بِتشوف فيهاالعافيه
بالصّلى الحِقِد بيذوب ___ بِتِمْلا بالحُــبِّ الدّافــي
بتِلقى حالَك المحبوب ___ بِتْـقول ربّي عاطــيني