أهلا وسهلا طل علينا أيار
والعامل المسكين بعدو بإنتظار
بعدو الغلى موجود وألأسعار نار
وراتب العمال نازل بإنهيار
قديش سعر النفط والوقود صار
والكهربا والمي في أعلى أسعار
العامل من الصبح من أول النهار
بسعى وبكافح وبترك ولادو الصغار
من شان يربيهم بعز وإفتخار
ويعيش العمر شامخ ما يحملش عار
كل الشهر بشقى تيوصل لقرار
بلاقي وراق الدفع من حوله كتار
هذا الوضع صعب لازملو غيار
الفكر محتار أما العقل طار
العامل إلو أهميه بإختصار
لازم يكون إسمو مع الناس الكبار
بتكون أرض البور أشواك وحجار
بتصير خصبه مزينه بأجمل خضار
بتكون صحره قاحله ما فيها دار
بتصير جنه فيها خيرات وأشجار
بتكون قريه مدمره كلها دمار
بتصير مدينه معمره بأجمل عمار
لولا وجود العامل بعزم وإصرار
ما صار تطور بهالدنيا وإزدهار
من شان هيك قبل ما يجف العرق
إعط العامل حقه بأحسن أجار