منشور اياس ناطور المرشح في قائمة الجبهة لانتخابات الكنيست القادمة 

 

الشرف.. قبل ميثاق الشرف..

في الأيام الأخيرة... كِثر الحديث عن ميثاق الشرف.

قبل ميثاق الشرف... بدنا نحكي عن الشرف نفسه.

لأنه مش كل إشي مكتوب على ورقة... بصير شرف.

الشرف... مش توقيع.

الشرف... مش بيان.

الشرف... إنك تدفع ثمن موقفك... مش تدوّر على ثمن لموقفك.

اليوم...

إحنا امام معركة غير عادية. إحنا امام معركة مصيرية وجودية.

ومهمتنا الوطنية واضحة:

إسقاط حكومة اليمين المتطرفة ... وإسقاط حكومة بنيامين نتنياهو.

بس اسمحوا لي أحكيها بوضوح:

المعارك الكبيرة ما فيهاش نصف انتصار.

إمّا ننجز المهمة كاملة…

وإمّا نترك الباب مفتوحًا لعودة الخطر من جديد.

إذا كان خصمك منظّم... لازم تكون أنت أكثر تنظيمًا.

وإذا كان خصمك موحّد... لازم تكون أنت أكثر وحدة.

إحنا مش داخلين الانتخابات عشان نعدّ المقاعد.

إحنا داخلين الانتخابات... عشان نغيّر ميزان القوة.

بدنا الحكومة الجاية... أيًّا كانت... تدخل وهي عارفة... إن قدّامها قوة عربية كبيرة... قوة موحّدة... قوة بتفرض احترامها وبتفرض حضورها.

حكومة اليمين…

لا تخاف من حزبٍ عربي.

لكنها تخاف… من مجتمعٍ عربيٍّ موحّد.

ومن هون... بدي أسأل سؤال بسيط وواضح:

إذا كانت هاي هي المهمة... شو لازم نعمل؟

نكبّر قوتنا... ولا نصغّرها؟

نجمع صفوفنا... ولا نفرّقها؟

نوحّد شعبنا... ولا نبعثره بين القوائم؟

الجواب معروف. والناس كلها بتعرفه.

القائمة المشتركة الرباعية... ما كانت مجاملة.

ما كانت صورة. ما كانت ديكورًا انتخابيًا.

كانت الأداة السياسية الأقوى... لتحقيق هاي المهمة الوطنية.

ولهيك...

لما تعطّلت المشتركة التقنية، التعددية، صاحبة تقاسم الادوار…

اللي خسر مش حزب!!

اللي خسر... هو شعبنا..

بالمناسبة…

لا أحد يستطيع أن ينكر بانه عند إخواننا في القائمة العربية الموحّدة

موهبةً استثنائية!!

ليس في صناعة الوحدة…

بل في صناعة المصطلحات.

كلما ابتعدوا خطوةً عن الوحدة…

اخترعوا مصطلحًا جديدًا.

مرّة…

“القائمة التقنية”.

ومرّة…

“التعددية”.

ومرّة…

“تقاسم الأدوار”.

واليوم نسمع مصطلح:

“الكتلة المكمّلة”.

وكلما تغيّر الاسم… بقيت النتيجة نفسها. تفكيكٌ للوحدة وإضعافٌ لقوة مجتمعنا.

هم بارعون في صناعة المصطلحات…

ونحن نريد صناعة الوحدة.

هم يبدّلون الكلمات… لكنهم لا يبدّلون النتائج.

أما نحن… ما بهمنا اسم المشروع… بقدر ما يهمّنا أن يخدم مشروع شعبنا.

لأن شعبنا…لا يحتاج إلى قاموسٍ جديد. ولا إلى مصطلحاتٍ جديدة.

شعبنا يحتاج إلى قرارٍ واحد…

قرارٍ يعيد توحيد الصف.

فالناس في النهاية…

لا تحاسب الأحزاب على الكلمات…

بل تحاسبها على النتائج.

بعد كل هذا... بيجوا بحكولنا كمان مصطلح:

”ميثاق شرف... ” اللي مخبي داخله موضوع فائض الأصوات.

بصراحة... هون لازم نحكي الحقيقة بلا مجاملة.

فائض الأصوات مش علاج للوحدة...

إذا كان القرار من الأصل ضد الوحدة..

فائض الأصوات مش موقف سياسي...

إذا كان المطلوب منه يغطّي على غلطة سياسية..

فائض الأصوات مش شجاعة...

إذا صار بديلًا عن القرار الشجاع: قرار الوحدة.

كيف بدكم منّا نعطي شرعية لطريق إحنا مقتنعين إنه أضعف المهمة الوطنية؟

كيف بدكم منّا نقول للناس: هاي كانت غلطة سياسية... وبعدين نرجع نقول لهم: تعالوا عالجوها بفائض أصوات؟

هيك منكون بنضحك على حالنا... وبنطلب من الناس يصفّقوا للتناقض.

وإحنا ما منضحك على حالنا. ولا منضحك على الناس.

قبل ما تطلبوا فائض أصوات... رجّعوا فائض الوحدة.

قبل ما تحكوا عن ميثاق شرف... رجّعوا شرف الالتزام بالمهمة الوطنية.

أنا بعرف انو الحديث عن السلام، وعن المساواه، والاحتلال، وعن الجريمة في وسطنا ، ما بيرجعكم لوحدة الصف بقائمة رباعيه

بس أنا بعرف شو اللي ممكن يرجّعكم للمشتركة.

شغله من الثنتين او الثنتين مع بعض!!

لما تكتشفوا... إن الرهان على إنكم تكونوا ”بيضة القبان“ في الحكومة الجاي... كان رهانًا خاسرًا. وهذا ما سيحدث في الانتخابات القادمة..

والشغلة الثانية لما تكتشفوا انو مجتمعنا العربي الوطني الاصيل الشريف لا يدعم حزب يُفشل مشروع وطني مصيري ووجودي..

وعندها ستحاربون على كيانكم وعلى عبر نسبة الحسم !!

لأن صوت الناس... أقوى من كل خطاب... وأقوى من كل بيان... وأقوى من كل ميثاق.

إحنا مش ضد حزب. وإحنا مش ضد شخص.

إحنا مع مشروع.

إحنا مع مسؤولية.

إحنا مع مهمة وطنية أكبر من الجميع.

لأن الحكومات بتتغيّر... لكن الشعوب بتبقى.

والانتخابات بتيجي وبتروح...

لكن القرارات الوطنية... آثارها بتضل سنين.

ولهيك... إذا بدكم تحكوا عن الشرف... خلّونا نبدأ من هون:

شرف الالتزام بالمهمة الوطنية.

شرف وضع مصلحة شعبنا فوق كل مصلحة.

شرف إنك لما تختار... تختار شعبك قبل مصالحك.

لأن أكبر فائض ممكن نقدمه لشعبنا... مش فائض أصوات.

أكبر فائض... هو فائض الوحدة.

أكبر فائض... هو فائض القوة.

أكبر فائض... هو فائض الانتماء الحقيقي لشعبنا.

والسلام عليكم ورحمة الله وبركاته.