أدب وشعر
10/09/2013 - 03:49:52 pm
يا خالتي يرحم أبوك كتبها: زاهد عزت حرش شفاعمرو
مهداة الى معظم زعماء البلدات والقرى العربية
كتبها: زاهد عزت حرش
يا خالتي يرحم ابوك
وكل من كانوا يقربوك
كيف صار وأقنعوك
وثوب الرئاسه لبسوك
بشغلتك يا خالتي كنت المدير
كنت الآمر الناهي.. كنت الأمير
بعيشتك مبسوط بالكم القصير
كيف صار وهيك ورطه ورطوك
كنت عايش ع السراط المستقيم
يومك هني.. ومن موقعك عامل زعيم
كل الحكي.. وطلعت يا ستي غشيم
ركبوا عليك.. من فوق عرشك نزلوك
يا خالتي هذي البلد بدها زعيم
إيدمي بحكم العقل واعي وحكيم
رايق.. قوي بالمرجله.. ويمكن لئيم
كان بسوى قبل هيك يدربوك
انتِ اللي بدك هيك فوتي تفوت
مش قدها.. لو قدها ما كنت مبغوت
أربع سنين.. ومتستر بورقة توت
لو بقيت ع حالك.. كان ممكن يرهبوك
لا نظافه.. لا شوارع.. لا طريق
كل مالها بلدنا ع وسعها.. بتضيق
ما ضل في شغله تبل الريق
كلو حكي فاضي.. ومثل الحكي بفبركوك
بعمري ما احتجت غيرك.. ولا محتاجك
قصدي البلد تعلا.. مش طبخه ع مزاجك
خايف اللي وصلك.. توصلو مثل ما جابك
وفاتورة اللي برقبتك.. وقت اللزوم يدفعوك
انتباه
حميت ودارت وللي ما شافها أعمى
بشهر المرحبا.. وقعت الكلمه ما حدا لمى
يا بلد مجروح.. وسنين شو نزف دما
كيف يا بلد.. ممكن يعودوا يكرموك
حميت ودارت.. واللي ما شافها يشوف
طبخوا ألانتخابات.. والطبخ مكشوف
يا ناس عم تمشي صفوف صفوف
مين اللي بكرا يا بلد رح يحكموك
حميت ودارت وشافها العميان
منبكي على ايام ضيعها الزمان
يا بلد للعز كانت للكرم عنوان
راحت.. ولو رجعت الايام.. يبقوا يرجعوك
قلبي على أجيال ما الها أمل
طرقات عم تنزف.. وضاربها الملل
لا ثقافة.. لا مراكز.. لا عمل
يا شاب.. بكفي بكلامن يبلفوك
شفاعمرو آب 2013
اضف تعقيب