أدب وشعر
13/08/2023 - 06:36:38 am
موشحات في الغزل فستانِك بقلم اسماء طنوس المكر
موشحات في الغزل فستانِك بقلم اسماء طنوس المكر
بلون الأخضر فستانِك
ساحر الِعيون
وزِنّار اللّافف خصرِك
أخضر اللّون
_____________
أمّا الأحمـر عَجـِسـمِـك
عاكِس عَخدود
شو لابِق على كَسـمِـك
ضَيِّق مَشـدود
واللّي ساحِـرني بقـدِّك
جمـال العـود
بالسّواره اللّي بزنـدِك
رُحِت مفتون
______________
وِالزّهري بياخذ عقـلي
وِبْيِضوي ضَي
بيِقهـرني وما بـيخَـلّي
ولا حـيلي فِـيّ
جـيـت عيـوني أمَـلّي
كَــوَتْـني كَي
قالت جمالي وَحدُه إلي
وعَليهِ بصون
______________
ياام الفـستـان النـيـلي
ودايِر منقوش
قلبـي دَومـاً دلــيـلي
فاهـم عَالرّموش
والعِقـدِ اللّي بِجــيـدِك
ذهب مغـشـوش
راح جيبِ اللّي بيِلبقلِك
حُسنِك ما يهون