زياد شليوط

"اتفق العرب على ... أن يتفقوا"

أبو كوع: احنا العرب والله حيرنا الخالق معنا..

أبو ركبة: شو القصة يا رجل؟

أبو كوع: يا أخي قبل ما تتوحد الأحزاب كنا نسمع ليل نهار طلبات الوحدة من الناس.

أبو ركبة: بل تهديدات بعدم التصويت ومعاقبة الأحزاب اذا ما توحدوا؟

أبو كوع: وكيف بتفسر اليوم كثرة الأصوات اللي بتطلع في كل مكان بتسب على الوحدة وبدها تقاطع الانتخابات؟

أبو ركبة: يعني كيف بقاطعوا؟

أبو كوع: بقاطعوا حالهم ورح يصيبهم زي ما بقول المثل: اللي بجاقر حالو بعملها في ....

أبو ركبة: يعني سمعت أشخاص بقولو هاي قائمة تصفيط كراسي، والبعض بقول هاي وحدة كذابة ومصالح وغيره.

أبو كوع: وأنا برد عليهم لهؤلاء انو كلامهم صحيح، وهذا شي طبيعي يعني وين الغرابة؟

أبو ركبة: انو ما بحكو عن برنامج للقائمة!

أبو كوع: هذا غير صحيح، فالبرنامج متفق عليه وكل الوقت كنا نقول وين الخلافات بين الأحزاب العربية في الكنيست؟

أبو ركبة: طيب ليش التركيز على المقاعد؟

أبو كوع: لأنو هذا هو حال الانتخابات، انظر للأحزاب الصهيونية –وهذا ليس تبريرا- يتقاتلون على المقاعد، وفي محاكم وتهجمات وانقسامات، على الأقل عنا البوصلة كانت قائمة مشتركة، وهذا تم.

أبو ركبة: طيب ليش التهجمات؟

أبو كوع: هذا السؤال الذي يجب أن يطرح. انظر من المتهجم وتعرف السبب.

أبو ركبة: يعني بتقللي في مصالح ونوايا داخلية، وخيبة أمل شخصية لدى البعض.

أبو كوع: وفي كمان عن صدق وصراحة وهؤلاء سنتحدث عنهم في لقاء قادم.

أبو ركبة: ماشي صديقي.  

أبو كوع: بس لا تنسى انو أحزابنا كسروا قاعدة مهمة بتقول..

أبو ركبة: اتفق العرب على ألا يتفقوا.

أبو كوع: صدقت.

قائمة مجاقرة

أبو كوع: سمعت اللي بقول عن القائمة المشتركة انها قائمة جمعت الخصوم والأضداد للمحافظة على مصالحهم.

أبو ركبة: وليه قتل حالو حتى يكون مرشح في القائمة المشتركة، ما كانت يومها وحدة خصوم وأضداد؟

أبو كوع: ولا نسي شو عمل لما انفصل عن حزبه السابق وبعدين أنشأ حزبا جديدا؟

أبو ركبة: والله السياسة عنا مهازل، يعني الخشبة في عين الواحد وبقلك شوف القشة في عين غيري.

أبو كوع: ومش بس هيك وبعلن "نزف لشعبنا بشرى تشكيل القائمة العربية"؟

أبو ركبة: أي زفة وأي عربية، لو قال ننعى لشعبنا القائمة العربية بكون أصدق وأدق لوضعهم.

أبو كوع: والأحلى انو مع حليفه الجديد يتهمان المشتركة انها لا تمثل كل القطاعات والفئات في مجتمعنا العربي.

أبو ركبة: هات لنشوف وين الفئات التي تمثل مجتمعنا في قائمتهم؟

أبو كوع: صدق اللي قال شر البلية ما يضحك.. وين المرأة في قائمتهم وهي نصف المجتمع اللي يتباكون عليه؟

أبو ركبة: ومبارح كان يدافع عن الأكاديميين، أين تمثيلهم في قائمته؟

أبو كوع: بل أين سكان المدن الساحلية؟

أبو ركبة: أين وأين وأين؟

أبو كوع: وشو رأي رئيس المجلس اللي هاجم القائمة المشتركة على تجاهل بدو الشمال، شو بقول عن القائمة الجديدة؟

أبو ركبة: وشو رئيس هالحزب اللي ماشي لحالو، وكل حزبو معارض خطوته، وين في ديمقراطية مثل هذه؟

أبو كوع: تخيل انسان راسو ماشي للخلف، وجسمو ماشي لقدام!

أبو ركبة: يا أخي اللجنة المركزية بتقللو احنا مع المشتركة والوحدة فيها، ومؤسس      الحزب ترشح في مكان فخري ويدعم القائمة المشتركة باسم حزب آخر.

أبو كوع: وهو مش متنازل عن عناده وبعلن عن تشكيل القائمة البديلة من حيث البرنامج والتمثيل.

أبو ركبة: التمثيل وشفنا أي تمثيل عندو، تنويع وتعددية لم ينجح بمثلها بينيت!

أبو كوع: يعني باختصار هذه قائمة مجاقرة، لأنو الأحزاب ولجنة الوفاق لم تمنحه كرسيا.

أبو ركبة: كأن قائمتو ليست تصفيط كراسي!

أبو كوع: المشكلة انو الكراسي عندو مسفطة، بس ما في مين يقعد عليها.

أبو ركبة: هو بقلك عندو برنامج بديل، شو برنامجو؟

أبو كوع: يظهر بدو يطالب بدولة فلسطينية في القمر، واعلان الحكم الذاتي في النقب، وتعيينه رئيسا لاقليم النقب.

أبو ركبة: وشو مع حليفه الجديد ابن الجليل؟

أبو كوع: بسيطة بعطيه حق اللجوء السياسي، وبعينو نائب الو أو رئيس حكومة اقليم النقب.

أبو ركبة: اذا هيك بدي ألحق حالي على القائمة البديلة بلكي بحصللي منصب وزير....

تحليلات .. تخبيصات

أبو ركبة: ...ول ول مالك يا أبو كوع، مالك لا سلام ولا كلام.

أبو كوع: اتركني بحالي يا أبو ركبة، ما عدت أشوف ولا بدي أسمع.

أبو ركبة: خير.. خير شو صاير حتى ضايق خلقك.

أبو كوع: يا عمي ما بتسمع الاذاعات عنا، وما بتسمع المحللين كفاك الله شرهم.

أبو ركبة: لا ما بسمع، انت دايما حد الراديو.

أبو كوع: خلص، لا عاد بدي أسمع ولا أقشع.

أبو ركبة:طيب عال، بس قللي شو اللي صار.

أبو كوع: يا أخي، ما عاد حدا من عربنا إلا وصار محلل سياسة وانتخابات.

أبو ركبة: يعني ما عاد في دراويش غيرنا، وشو التحليلات اللي تركتك بهالحالة؟

أبو كوع: يا أخي اشي بخلي الواحد يكفر.. في واحد عامل حالو أو عاملينو محلل وباحث ومفكر، قبل تشكيل القائمة المشتركة كان يقول ما أحزابنا العربية ما بتتفق ولا بتتوحد، بعد ما اتفقوا وشكلوا قائمة، طلع يقول، هذه القائمة ستفرط بعد الانتخابات بيوم أو يومين، هذا محلل ولا غراب ينعق؟

أبو ركبة: عن جد اشي بفلق ومنيح اللي بعدك ما فاقع، يا أخي التحليل صار زي التخريف، هالاذاعات فاتحين هالموجة وخد تحليلات وتفسيرات وتخبيصات.

أبو كوع: يعني اذا الواحد وضع حرف دال أو حرف باء قبل اسمو، يعني صار يفهم أكثر من غيرو؟

أبو ركبة: أي احنا بنفهمها وهي طايرة، خلقنا بالسياسة وبنعرف أكثر منهم حتى لو ما حملنا شهادة من الجامعة، الشهادة اللي معنا شهادة الحياة وهي أكبر بكثير من شهادة الجامعة.

أبو كوع: ولا عندك مذيعين، قال بدهم يقلدوا زملاءهم اليهود وبحاولوا يستفزوا اللي بقابلوه، بس استفزازهم بايخ كمان. وبطرحوا أسئلة بتخليك تلعن الساعة اللي بتسمع فيها برامجهم.

أبو ركبة: يا أخي ما هو كمان اللي بطلعوا في البرنامج بصيروا يخلطوا شعبان برمضان في كلامهم.

أبو كوع: لهذا قررت اني أرتاح وما أسمع مقابلات حتى يوم الانتخابات..

أبو ركبة: من زمان لازم توخد هذا القرار.

المقاطعون.. على هواهم

أبو ركبة: بتعرف يا صديقي شو اللي محيرني.

أبو كوع: من كثرة المواضيع ما عدت أعرف، من قصيرو، شو اللي محيرك؟

أبو ركبة: جماعة المقاطعة.

أبو كوع: بتقصد مين اللي ما بصوتوا.

أبو ركبة: مش اللي ما بصوتوا نتيجة الاهمال واللامبالاة أو المرض أو ما شابه.

أبو كوع: لكان مين قصدك، لا يكون جماعة أبناء البلد والحركة الاسلامية الشمالية والفرقة الجديدة اللي انشقت عن التجمع.

أبو ركبة: أيوا كفاح يا خوي، واللي شكلوا مع بعض اللجنة الشعبية لمقاطعة الانتخابات.

أبو كوع: والله فعلا شي بحير، قال هم ضد الانتخابات.. وبشتغلوا انتخابات.

أبو ركبة:بعقدوا اجتماعات قطرية ومحلية لاقناع الناس بعدم التصويت، ما هذا شغل انتخابات!

أبو كوع: قال يا سيدي بقولوا عن القائمة المشتركة انها قائمة كراسي مضمونة.

أبو ركبة: طيب هاي فهمناها وصارت قديمة.

أبو كوع: وبزيدوا انها بعيدة عن أي شكل من أشكال الوحدة الوطنية أو حتى الشراكة الوطنية..

أبو ركبة: ول.. ول .. العمى، مبارح كانوا متحالفين معهم، وبجلسوا معهم في لجنة المتابعة، كيف يعني ما عادوا وطنية.

أبو كوع: والله ما بعرف، كل واحد صار يفصل الوطنية على ذوقو.

أبو ركبة: قال شو، يجب على الوحدة الوطنية أن تتجسد في النضال الشعبي الموحد..

أبو كوع: طيب يا أخي ما يوحدوا حالهم بالأول قبل ما يعطوا شهادات لغيرهم، ليش ما بتوحدوا في النضال الشعبي؟

أبو ركبة: والأطقع من هيك بقولوا انو "مقاطعة الانتخابات المقبلة هي هدف وطني مباشر" وبعدها بزيدو "بغض النظر عن المنطلقات للمقاطعة".
أبو كوع: يعني جماعة حزب العمل الزعلانين واللي بدهم يقاطعوا الانتخابات كمان منطلقاتهم وطنية حسب كلامهم، بل أكثر من أحزاب المشتركة!

أبو ركبة: وكمان نصبوا حالهم ممثلين للجماهير "الغفورة"، وبقولوا "موقف الجماهير الشعبية التي نحن صوتها وعنوانها".

أبو كوع: يعني احنا من أي جماهير يا خوي، الشعبية ولا في جماهير ثانية واحنا ما ندري؟

أبو ركبة: طيب كيف تشرحلي انو في أشخاص منهم قبل سنتين كانوا نشيطين في الانتخابات ويدعون الناس للتصويت بحرارة؟

أبو ركبة: وكيف حضرتك بتفسر لي، قولهم انو الكنيست مؤسسة صهيونية ولا زم نقاطعها، وهم ما بقاطعوا مؤسسة التأمين الوطني، ودائرة الترخيص، ومكاتب العمل، ووزارة المعارف والداخلية وغيرو، أليست هذه مؤسسات صهيونية؟!!!

أبو كوع: لا والأفظع أنو أحد قادة المقاطعين بطلع في مقابلة مع راديو "صوت اسرائيل" بالعربية، ليهاجم التصويت للكنيست ويدعو للمقاطعة.. من يومها اقتنعت انو "صوت اسرائيل" صار راديو وطني وما عاد بوق صهيوني!!

أبو ركبة: اطلب لي سيارة اسعاف بسرعة..